Nei, Bergens Tidende: Sogn og Fjordane er ikkje lagt ned!
Det rette er at Sogn og Fjordane fylkeskommune er lagt ned, men at Sogn og Fjordane lever.
- Kai Aage PedersenRedaktør, Firda
Regionavisa Bergens Tidende gjer stadig vekk eit poeng av at Sogn og Fjordane ikkje eksisterer lenger. Siste innslag i serien fekk vi i eit intervju med Liv Signe Navarsete som takkar nei til attval til Stortinget « … Etter valet i 2021 skal ho tilbake på heimebane, som ho konsekvent omtalar som «Sogn og Fjordane, sjølv om fylket ikkje lenger eksisterer…», skriv avisa.
I ein redaksjonell artikkel gjer altså Bergens Tidende eit retorisk poeng av at Navarsete snakkar om Sogn og Fjordane – også etter fylkessamanslåinga på Vestlandet. At Sogn og Fjordane framleis eksisterer i daglegtalen, og at både Sogn og Fjordane eksisterer på kartet, blir oversett i iveren etter å gjere alt nord for Bergen til eit nytt strileland, dei kan ha moro med på morgonmøta i redaksjonen i BT.
Den same avisa karakteriserer også Sogn og Fjordane Senterparti som frekke når dei peikar på manglande statleg finansiering av regionreforma. «Det er på tide å akseptere at Sogn og Fjordane er lagt ned», skriv kommentator Gerd Margrete Tjeldflåt, og hamrar laus på Senterpartiet si avdeling nord for Sognefjorden: «Det Sogn og Fjordane Senterparti driv med, er billig og splittande retorikk, og ei motarbeiding av alt dei eigentleg burde drive med», skriv Tjeldflåt.
Draumen om at alle i Vestland fylke skal meine det same som bergensarane, ser ut til å ha fått fullt gjennomslag i Bergens Tidende. Snart kjem truleg ein kommentar, eller kanskje også eit redaksjonelt oppslag, med ei skildring av kor lågt nivået er på journalistikken i Sogn og Fjordane (no omtalt som nord for Sognefjorden) . Underforstått: Dei mest geniale folka på Vestlandet har arbeidsstad i tårnet i Media City Bergen.
Trass i høgt sjølvbilete er det lite Bergens Tidende kan gjere med geografien. Hordaland er borte, men Sunnhordland og Nordhordland eksisterer. Også Sogn og Fjordane består, og kjem til å gjere det veldig lenge.
Som merkevare kjem Sogn og Fjordane til å eksistere lenger enn det Bergens Tidende ser ut til å like. Truleg går Sogn og Fjordane ei lysare tid i møte som ei felles geografisk eining enn då vi var hefta med vår eigen fylkeskommune.
Frøy Gudbrandsen: Når det er høglydt krangel på morgonmøtet i kommentaravdelinga, då er eg glad.
I Firda kjem vi framleis til å skrive om, og vere stolte av Sogn og Fjordane. Det skal meir til enn ei mislykka regionreform for å endre på det. Så får Vestlandets storavis, som har alle journalistane sine lokalisert i Bergen, halde fram med å påstå at Sogn og Fjordane ikkje eksisterer. Det rette er at Sogn og Fjordane fylkeskommune er lagt ned, men at Sogn og Fjordane lever.